Gipasalig sa 53rd Infantry “Matapat” Battalion sa Philippine Army sa publiko nga dili angay kabalak-an ang Inter-Agency Territorial Defense Operations Exercise o KALASAG-ZAMBOSUR 2026 nga pagahimoon sa nagkadaiyang barangay sa Zamboanga del Sur.
Matud ni 53RD IB Commanding Officer Lieutenant Colonel Rolando E. Vargas Jr., usa lamang kini ka training ug simulation exercise aron maandam ang mga sundalo ug partner agencies sa pag-atubang sa posibleng territorial defense situations.
Gipasabot ni Vargas nga naandan nang ginahimo sa kasundalohan ang ingon ani nga mga pagbansay isip pag-andam sa mga pwersa sa militar sa pagpanalipod sa hurisdiksyon.
Tungod niini, posible nga makita ang mas daghang sundalo, military vehicles ug ubang kagamitan sa mga lugar nga sakop sa exercise, diin posible usab nga makadungog ang publiko og simulated gunshots ug explosions isip kabahin sa pagbansay.
Gipasiugda ni Vargas nga dili kini pagpangandam alang sa gubat, kondili planado ug kontroladong exercise aron mapalambo ang ka-andam ug koordinasyon sa mga sundalo ug partner agencies.
Gihangyo usab niya ang publiko nga magpabiling kalmado, likayan ang mga designated exercise areas ug sundon ang mga pahimangno sa mga otoridad.
