Nagpagawas ug bag-ong gudielines ang Department of Labor and Employment (DOLE) alang sa pagpatuman ug pagmonitor sa mga wage order sa tibuok nasud. Subay sa Administrative Order 264, Series of 2026, ang mga DOLE regional offices ug RTWPBs gimandoan nga siguruhon ang pagsunod sa mga wage order ubos sa Labor Code.
Matud sa DOLE, ang aprubadong wage order mahimong epektibo ug dayon nga ipatuman 15 ka adlaw human kini mamantala sa usa ka newspaper. Gimandoan usab ang RTWPBs nga pasimplehon ang proseso sa mga establisementong mangayo og exemption sa wage order ug hugot nga susihon ang pagpatuman sa wage increase.
Ang mga kompanyang mapamatud-ang adunay kakulangan sa sweldo mahimong hatagan og compliance order ubos sa Labor Code. Kinahanglan usab nga magsumiter ang RTWPBs og implementation ug exemption reports sulod sa 30 ka adlaw human mahimong epektibo ang wage order.
Matud sa DOLE, magpadayon ang konsultasyon tali sa mga trabahante, management ug gobyerno alang sa hapsay ug patas nga pagpatuman sa wage orders sa tibuok nasud.
Photo Courtesy: Philippine News Agency
