Pormal nang nagpasaka og kasong grave threats ang Department of Justice batok kang Bise Presidente Sara Duterte niadtong Agosto 11, 2026, sumala sa tigpamaba sa ahensya nga si Atty. Polo Martinez.
Gipasaka ang kaso alas-1:30 sa hapon sa Office of the Clerk of Court sa Quezon City Regional Trial Court. Matod sa DOJ, ang kaso unang gisumite sa National Bureau of Investigation niadtong 2025 ug milungtad og kapin sa usa ka tuig ang pagproseso sa departamento.
Nakasentro ang kaso sa giingong pagpanghulga sa kinabuhi nila ni Presidente Ferdinand “Bongbong” Marcos Jr., First Lady Liza Araneta-Marcos, ug kanhi House Speaker Martin Romualdez.
Gipasaka ang kaso may kalabotan sa pahayag sa Bise Presidente nga giingong nakakuha siya og usa ka “hitman” ug gisugo kini sa pagpatay sa maong mga indibidwal kung patyon usab siya. Ang kaso ipaubos na sa proseso sa korte aron matino ang sunod nga legal nga mga lakang.
Photo Courtesy: MarketScreener
