Mokabat sa P135.3 milyon ang kantidad sa kadaot ug kapildihan nga nasinati sa sektor sa agrikultura tungod sa pagpanalasa sa mga bagyong Maymay, Luis ug sa hanging habagat. Base sa nagpadayon nga damage assessment sa mga regional office sa Department of Agriculture (DA), naapektuhan ang kapin 4,000 ektarya nga agricultural areas sa Ilocos Region, Central Luzon, Calabarzon, Mimaropa ug Western Visayas.
Labing dako ang kadaot ug kapildihan sa humay, gisundan sa mais, high-value crops, livestock ug poultry. Naapektuhan usab ang mga pasilidad sa irigasyon, makinarya ug mga kagamitan sa agrikultura. Tungod sa mga kalamidad, mikabat sa 4,465 metric tons ang production loss sa mga apektadong lugar.
Isip tubag sa DA, mahimong maka-avail ang mga apektadong mag-uuma og P106.5 milyon nga farm inputs, lakip ang bugas, mais ug mga liso sa utanon. Mahimo usab silang makautang og hangtod P25,000 ubos sa Survival and Recovery Loan Program sa Agricultural Credit Policy Council aron makatabang sa ilang pagbangon human sa mga kadaot.
