Giimbestigahan ang Maramag Municipal Police Station human gikataho ang usa ka dili ordinaryong insidente sa pagpangawat sa duha ka buhi nga kanding nga gipangsakay lamang sa usa ka luxury vehicle didto sa Purok 6, Anahawon, Maramag, Bukidnon niadtong Agosto 9, 2026.
Pormal nga mireport ang biktima sa kapulisan nakalabayng adlaw, diin sumala sa biktima, gigapos pa niya ang iyang duha ka laking kanding (billy goats) nga may kolor brown ug puti/brown nga naga-edad og 2 hangtod 4 ka tuig sa daplin sa National Highway niadtong alas-6:00 sa buntag, apan sa iyang pagbalik, nawala na ang mga mananap sa nahimutangan niini.
Pinaagi sa pagrepaso sa mga kuha sa CCTV sa palibot, nadiskobrehan nga gikuha ug gipangsulod ang mga kanding sa wa mailhing mga suspek sakay sa usa ka itom nga Toyota Innova nga paspas nga misirit paingon sa amihanang direksyon (northbound).
Sa kasamtangan, nagpadayon ang pag-backtrack sa mga CCTV footage aron mailhan ang mga suspek ug matino ang plate number sa maong sakyanan, samtang nagpagawas na og mando ang Provincial Director sa kapulisan sa Maramag nga paspasan ang pagsulbad sa maong kaso ug dakpon ang mga nagpaluyo sa pagpangawat.
Photo Courtesy:Maramag MPS
