Gipahigayon dayon sa LGU Maramag ug Municipal Police Station ang usa ka imbestigasyon ug validation human makadawat og impormasyon bahin sa post sa social media nga naghulga nga magpabuto og granada sa usa ka lokal nga high school sa maong lungsod. Tumong sa kapulisan nga mailhan ang nagpaluyo sa maong post aron masiguro ang seguridad ug kaluwasan sa tanang estudyante, magtutudlo, ug opisyal sa tunghaan.
Sa usa ka eksklusibong pakighinabi sa Juander Radyo Malaybalay kang Police Captain Shiela Joy Jangad, gipahinumdoman niini ang publiko nga ang pagpanhulga bahin sa eksplosibo ug kabalaka—bisan kon giingong joke, o prank lamang—adunay bug-at nga legal nga sangputanan. Nanawagan usab ang kapulisan sa bisan kinsa nga adunay kasaligang impormasyon nga motaho dayon sa mga awtoridad.
Kahinumduman nga, nahitabo usab ang susamang pagpanhulga sa Malaybalay City National Science High School sa Barangay Aglayan pinaagi sa usa ka dummy account niadtong Agosto 5, 2026.
Tungod niini, giawhag sa mga awtoridad ang publiko, ilabina ang mga ginikanan ug kabataan, nga magpabiling kalmado ug likayan ang pag-share sa maong mga post aron dili makamugna og dugang nga kalisang sa komunidad
Photo Courtesy: First aid product
