Magsugod na sa Agosto 14 hangtod 16, 2026 ang gipaabot nga Provincial Linggo ng Kabataan 2026nga pagahimoon sa Dakbayan sa Valencia, ilalom sa temang “Empowered Youth, Brighter Future, Stronger Bukidnon!”
Pangulohan ang maong kalihukan sa Provincial Youth Development Office (PYDO) – Bukidnon alang sa pag-ila ug paghatag og gahum sa kabatan-onan gikan sa nagkadaiyang lungsod sa lalawigan.
Nagtumong ang tulo ka adlaw nga selebrasyon sa pagpalambo sa katakus ug pamunoan sa mga batan-on, pagdasig sa ilang aktibong partisipasyon sa komunidad, ug pag-ugmad sa mga bag-ong ideya alang sa kalamboan sa nasod.
Gidisenyo usab ang maong aktibidad aron mapalig-on ang paghiusa ug pakigtambayayong sa mga kabatan-onan aron makatabang sa pagpanalipod ug pagpauswag sa Bukidnon.
Pinaagi sa nagkadaiyang programa sa pagpalambo sa kaalam ug kahanas, gilauman nga ang maong okasyon magsilbing hagit ug inspirasyon sa mga partisipante nga mahimong kaabag sa positibong kabag-ohan sa katilingban.
Giawhag sa PYDO-Bukidnon ang tanang sektor sa pagsuporta ug pag-apil sa maong tinuig nga selebrasyon
Photo Courtesy:PYDO – Bukidnon
