Pinaagi sa mga gihimong lakang ug kampanya, mikabat sa 141 ka kaso sa dengue ang natala sa Malaybalay City gikan Enero hangtod Agosto 8, 2026. Mas ubos kini kumpara sa kinatibuk-ang 363 ka kaso nga naitala sa niaging tibuok tuig 2025.
Sa usa ka eksklusibong pakighinabi sa Juander Radyo Malaybalay kang Mhegan Dominguez, Health Education Promotion Officer III sa City Health Office (CHO), gipahayag niini nga maayong balita nga walay natala nga namatay tungod sa dengue karong tuiga. Aron mapadayon kini, padayong gipahigayon sa CHO ang information campaign, clean-up drives, ug ang “4S Strategy” o Search and Destroy sa mga dapit nga puy-anan sa mga lamok. Aduna usab silay giandam nga NS1 testing kit alang sa mga tawong nagpakita og sintomas.
Samtang, gipatin-aw sa CHO nga ang pagpahigayon og fogging kay himoon lamang kun adunay clustering o sunod-sunod nga kaso sa usa ka dapit.
Tungod niini, giawhag ang tanang residente ug mga opisyal sa barangay nga magtinabangay sa pagpanglimpyo, magsul-ob og pambaba ug tag-as nga sinina ang mga bata, ug magpakonsulta dayon sa doktor kung makasinati og hilanat.
Photo Courtesy: CHO – Malaybalay City
