Gipakusog sa Provincial Agriculture Office sa Zamboanga Sibugay ang mga programa alang sa pagpangandam sa sektor sa agrikultura batok sa posibleng epekto sa kalamidad. Tumong niini nga mapanalipdan ang panginabuhian sa mga mag-uuma ug maminusan ang posibleng kadaot sa mga pananom ug livestock panahon sa bagyo, baha ug uban pang kalamidad.
Lakip sa mga gihimo nga lakang ang paghatag og impormasyon ug teknikal nga giya sa mga mag-uuma bahin sa disaster preparedness. Gidasig ang mga agricultural workers ug farmers nga mag-andam daan, ilabina sa ilang mga binhi, kagamitan ug mga hayop, aron malikayan ang dakong kapildihan kung moigo ang kalamidad.
Padayon usab ang koordinasyon sa Provincial Agriculture Office uban sa mga lokal nga pangagamhanan ug uban pang concerned agencies aron mas paspas ang paghatag og tabang sa mga apektadong mag-uuma. Apil niini ang pag-assess sa mga kadaot sa uma ug pagplano sa mga recovery ug rehabilitation programs human sa kalamidad.
Pinaagi sa maong mga programa, gilauman nga mas mahimong andam ug lig-on ang sektor sa agrikultura sa Zamboanga Sibugay sa pag-atubang sa mga katalagman. Gipahinumdoman usab ang mga mag-uuma nga ang sayo nga pagpangandam importante aron mapanalipdan ang ilang panginabuhian ug mapadayon ang produksyon sa pagkaon sa probinsya.
Photo Courtesy: Wikipedia
