Andam na ang 1,415 ka benepisyaryo sa Hagonoy, Davao del Sur sa bag-ong pamaagi sa pagdawat sa UPLIFT Assistance pinaagi sa digital payout.
Ang mga benepisyaryo makadawat og P2,000 kada bulan gikan Hulyo hangtod Disyembre 2026. Manual payout ang gigamit alang sa unang bulan, samtang digital payout na ang ipatuman gikan Agosto hangtod Disyembre.
Ang UPLIFT o Unified Package for Livelihoods, Industry, Food and Transport Assistance usa ka programa sa Department of Social Welfare and Development o DSWD alang sa mga kwalipikadong indibidwal ug pamilya.
Alang sa mga senior citizen ug dili pa pamilyar sa digital transactions, mahimong hagit sa sinugdanan ang bag-ong sistema. Apan pinaagi sa orientation ug assistance, gihatagan sila og higayon nga makat-on ug maanad sa proseso.
Matud sa usa ka benepisyaryo, medyo lisod sa sinugdanan tungod kay dili pa siya pamilyar sa digital system, apan maayo usab kini kay makat-on sila ug mahimong mas dali ang pagdawat sa ayuda sa sunod.
Samtang nagpadayon ang digital payout hangtod Disyembre, gilauman nga mas maanad ang mga benepisyaryo sa paggamit niini.
Dili lamang pinansyal nga ayuda ang gihatag sa UPLIFT, kundili bag-ong kahibalo ug kasinatian sa digital transactions, nga makatabang usab kanila sa ubang pang-adlaw-adlaw nga transaksyon.
