Giila na sa mga awtoridad ang lalaki nga miambak ug namatay sa Atugan Bridge sa Impasug-ong, Bukidnon niadtong Sabado sa gabii, Agosto 8, 2026.
Nailhan ang namatay nga si Melvin Lura, 34-anyos ug residente sa Barangay Poblacion, Libona, Bukidnon, kinsa mao usab ang gitudlong suspetsado sa pagpatay sa iyang live-in partner nga si Fritz Quijada kinsa ang nadugta nga lawas sa biktima nakaplagan sa usa ka sapa sa maong lungsod niadtong Agosto 3, pipila ka adlaw sa wala pa ang maong insidente sa tulay.
Sa exclusive nga pakighinabi sa Juander Radyo Malaybalay nagpadayag sa iyang dakong kasakit ang inahan sa suspetsado nga si Nancy Lura Dagpin apan gitin-aw niini nga wala niya gikonsinte ang gibuhat sa iyang anak kon tinuod man nga nakahimo kini sa maong krimen.
Nakumpirma sa pamilya ang pagkatawo ni Melvin human gipakita sa kapulisan ang litrato ug usa ka sulat nga gibilin sa lalaki nga naglakip sa katapusang mensahe nga “I love you, Badz,” diin nagpasabot kini sa iyang saad nga mosunod sa namatay nga live-in partner.
Nagtuo ang inahan nga posibleng konsensya ang iyang anak hinungdan nga nahimo niini ang pag-ambak, gawas pa sa giingon niining gihuptang baruganan nga dili gayud siya magpadakop nga buhi.
Sa kasamtangan, padayon pa ang gihimong imbestigasyon sa mga awtoridad aron sa pormal nga pagrepaso ug pagproseso sa duha ka managlahing insidente
Photo Courtesy: Impasug-ong MPS/ Mark Sales
