Nanawagan si Pope Leo XIV nga ihunong na ang nagpadayon nga gubat sa Ukraine ug tahuron ang international humanitarian law taliwala sa nagkadaghang sibilyan nga nangamatay ug naangol sa duha ka bahin.
Sa iyang mensahe sa wala pa ang Angelus prayer, gipasiugda sa Santo Papa nga kinahanglang hunongon na ang mga pag-atake batok sa mga inosenteng tawo, ilabina sa mga kabataan, samtang nagkadako ang kabalaka sa kalibutan sa epekto sa maong giyera.
Base sa datos sa United Nations (UN), kapin na sa 16,000 ka mga sibilyan ang namatay sa halos upat ug tunga ka tuig nga giyera tali sa Ukraine ug Russia, diin kadaghanan sa mga biktima kay mga lungsuranong Ukrainian. Gidugang pa sa UN human rights office nga misaka ug labaw sa usa ka ikatulo (1/3) ang ihap sa mga naangol ug namatay nga sibilyan sa Ukraine sa unang tunga pa lamang sa kasamtangang tuig.
Samtang padayon ang panawagan sa kalinaw, nagpadayon usab ang binabayloay og pag-atake tali sa duha ka nasud.
Photo Courtesy: People.com
