Nasikop ang usa ka High Value Individual (HVI) ug Top Priority Drug Personality nga giilang si alyas “Jemar” atol sa gipahigayong drug buy-bust operation sa mga kapulisan sa Mati City Police Station.
Gipangunahan ang operasyon ni PCpt. Ariel A. Ismael, Deputy Chief of Police kauban ang ubang law enforcement agencies, diin gipahigayon ang operasyon sa Purok Kaangayan, Barangay Badas, Mati City, Davao Oriental pasado alas 7:54 sa gabii niadtong Agosto 8, 2026.
Sa maong buy-bust operation, nasikop sa akto ang suspek ug nasakmit gikan sa iyang posisyon ang gibanabanang P340,000 nga kantidad sa gituohang shabu.
Sa pagkakaron gibalhog na ang suspetsado sa prisohan kinsa mag atubang sa kasong paglapas sa RA 9165 kun Comprehensive Dangerous Drugs Act of 2002. Samtang padayon ang paningkamot sa kapulisan pinaagi sa pakigtambayayong sa komunidad aron mapalig-on ang kampanya batok sa iligal nga droga ug masiguro ang mas luwas ug malinawon nga dakbayan sa Mati.
Photo Courtesy:Mati CPS
