Gituohan nga ang tubig nga atong giinom karon posibleng adunay pipila ka molecules nga kaniadto nakaagi sa lawas ni Cleopatra VII, matud sa pagtuon sa science ang bantugang Reyna sa Ehipto kapin duha ka libo ka tuig na ang milabay.
Sumala sa konsepto sa water cycle padayon lamang nga naglibot ug nag-recycle ang tubig sa kalibotan. Gikan kini sa kadagatan, mosaka ngadto sa atmospera, mahimong panganod, moulan, mosulod sa mga suba ug yuta, ug masuyop sa mga tanom, mananap ug tawo—sa dili pa kini mobalik pag-usab sa kinaiyahan.
Tungod sa dugay nang panahon sa maong natural nga proseso ug sa padayon nga pagsagol sa mga water molecules sa tibuok kalibotan, dako ang posibilidad sa estadistika nga ang pipila ka molecules sa tubig nga atong mainom karon kaniadto nakaagi usab sa lawas sa mga tawo nga nabuhi liboan ka tuig na ang milabay.
Apan dili kini direktang napamatud-an nga ang usa ka partikular nga water molecule gikan gayod kang Cleopatra. Ang punto sa maong konsepto mao nga tungod sa walay hunong nga water cycle ug molecular mixing, posible nga ang atong tubig karon adunay molecules nga kaniadto nakaagi sa lawas sa mga bantugang personalidad sa kasaysayan—ug bisan sa mga dinosaur.
Busa, sa imong sunod nga pag-inom og tubig, hunahunaa: posibleng adunay gamay nga bahin niini nga dugay nang nagbiyahe sa kasaysayan sa atong planeta.
Photo Courtesy: National Geographic
