Gitangtang sa Department of Energy (DOE) ang permits, technical clearance ug inspection fee alang sa mga panimalay ug mga negosyo nga mag-install og gagmay’ng solar panel.
Subay kini sa bag-ong polisiya nga gipirmahan ni Energy Secretary Sharon Garin aron dili na mangayo ang mga distribution utility ug bayad alang sa micro-solar ug zero-export systems.
Apil sa micro-solar system ang mga plug-and-play unit nga hangtod 1kW DC or 0.8kW AC diin dili na usab kinahanglan ang building permit ug compliance certificate. Kinahanglan lamang nga buhaton sa tag-iya ang pagpahibalo sa iyang electric utility human sa installation sa mga solar panel.
Giingon usab sa DOE nga ang polisiya gipatuman aron makunhuran ang gasto ug mapasayon ang paggamit sa renewable energy diha sa mga panimalay ug negosyo. Samtang, target sa gobyerno nga mapataas ang bahin sa renewable energy sa nasud ngadto sa 35% sa 2030 ug 5% sa 2040.
Photo Courtesy:MSN
