Niubos sa $103.38 bilyon ang Gross International Reserves (GIR) o dollar reserves sa Pilipinas niadtong katapusan sa Hulyo—ang pinakaubos nga lebel sulod sa usa ka tuig ug tunga o sukad niadtong Enero 2025. Sumala sa Bangko Sentral ng Pilipinas (BSP), nahitabo ang maong pag-ubos tungod sa ilang pagbaligya og dolyares aron mapanalipdan ug mapalig-on ang piso taliwala sa paglala sa gubat sa Middle East nga nagpataas sa halin sa dolyar ug nagpaubos sa piso sa makasaysayanong kagamay nga P61.85 kada dolyar.
Gawas niini, nakuhaan usab ang pondo tungod sa pagkuha sa pambansang gobyerno sa ilang deposito aron ibayad sa mga utang sa gawas sa nasud, bisan pa man kun medyo naangay-angayan kini tungod sa pagsaka sa presyo ug balor sa bulawan nga gihuptan sa BSP.
Bisan pa sa maong pag-ubos, gipasalig sa BSP nga nagpabilin gihapon nga “igo ug luwas” ang kasamtangang dollar reserves sa nasud. Ang maong pondo makatabon gihapon sa mga 6.7 ka buwan nga panginahanglanon sa pag-import og mga baligya ug serbisyo—labaw kaayo sa tulo ka buwan nga internasyonal nga sumbanan—ug makatabon og 3.6 ka pilo sa mubu nga termino nga utang sa nasud.
Matud pa sa bangko sentral, nagsilbi gihapon kini nga pader ug panalipod sa ekonomiya batok sa bisan unsang mga pagsulay ug kakurat sa merkado sa tibuok kalibutan.
Photo courtesy: Philippine News Agency
