Arestado sa hiniusang operasyon sa kapulisan ang usa ka 24 anyos nga lalaki nga giila isip Top 9 City-Level Most Wanted Person sa General Santos City. Nadakpan ang suspek nga giila lamang sa alyas nga “Dante” sa alas-10 sa buntag niadtong Agosto 8, 2026, sa Barangay Lun Padidu, Malapatan, Sarangani Province.
Ang pagdakop gipatuman pinaagi sa warrant of arrest batok sa suspek tungod sa paglapas sa Republic Act 10591 o Comprehensive Law on Firearms and Ammunition.
Ang maong warrant gipagawas sa Regional Trial Court, 11th Judicial Region, General Santos City, niadtong Hulyo 7, 2026. Nangapil sa operasyon ang 1st Sarangani Provincial Mobile Force Company, Police Station 2 sa General Santos City, Malapatan Municipal Police Station, Sarangani Provincial Intelligence Unit, RID 12, RIU, MARPSTA, ug CIDG SarGen.
Gipahibalo sa mga operatiba ang suspek sa iyang mga katungod isip akusado, samtang nadokumento usab pinaagi sa body-worn camera ang proseso sa pagdakop ug pagpasabot sa iyang constitutional rights.
Human sa operasyon, gidala si alyas “Dante” sa Dr. Jorge P. Royeca Hospital alang sa physical ug medical examination. Pagkahuman, temporaryong gitugyan ang suspek sa kustodiya sa may kalabotang police office samtang naghulat sa hustong legal nga proseso.
Matud sa kapulisan, kabahin kini sa ilang padayong pagpalig-on sa implementasyon sa mga warrant of arrest aron madala sa hustisya ang mga wanted nga indibidwal ug maatubang nila ang hustong proseso sa korte.
