Gihatagan og pagtagad sa Department of Health Region X ang kamahinungdanon sa pagplano sa pamilya aron masiguro ang maayong kalidad sa kinabuhi sa mga pamilyang Pilipino, ilabina nga lisod magkapamilya ug magpadako og anak sa karon nga panahon.
Gipasabot ni Dr. Liova De Guia sa DOH X N nga ang pagbaton og anak kinahanglan nga nakaplano o by choice and not by chance. Responsibilidad sa mga ginikanan ang pag-atiman ug pagsuporta sa ilang anak gikan sa pagkatawo niini hangtod sa makagraduate kini sa kolehiyo.
Giklaro sab ni Dr. De Guia ang pipila ka prinsipyo sa family planning sama sa Responsible Parenthood kung asa ang pag-atiman sa anak ang dako ug kinatibuk-ang responsibilidad sa ginikanan. Ikaduha ang Respect for Life o ang pagrespeto ug importansya sa kinabuhi. Ikatulo ang Birth Spacing kung asa girekomenda sa World Health Organization ang duha ka tuig nga distansya sa matag pagpanganak aron makarecover ug makapahulay ang lawas sa inahan. Ika-upat Informed Choice o ang gawasnon ug saktong pagpili sa magtiayon sa pamaagi nga ilang gamiton.
Gipatin-aw usab nga ang mga pamaagi sa modern family planning, natural o artificial method man kini, dili tinuod nga makahimo og abortion tungod kay ang bugtong katuyoan lamang niini ang pagpugong sa pagmabdos o prevention of pregnancy.
Kahibaloang sa bulan sa Agosto ginaselebrar ang National Family Planning Month.
Photo courtesy: Department of Health
