Giawhag sa Department of Health–Center for Health Development Northern Mindanao ang mga ginikanan nga likayan o minusan ang screen time sa mga batang usa hangtod tulo ka tuig ang edad, isip lakang sa pagpanalipod sa ilang mga mata.
Matod ni Dr. Clint Austin Quilab sa DOH-CHD Northern Mindanao, importante nga kontrolon sa mga ginikanan ang oras nga gigahin sa mga bata sa paggamit sa cellphone, tablet, computer ug uban pang gadgets aron malikayan ang mga problema sa panan-aw.
Kabahin kini sa padayong kampanya sa National Eye Health Program sa DOH nga mapakunhod ang gidaghanon sa mga bata ug mga hamtong nga mahimong maapektuhan ang kahimsog sa mata tungod sa sobra nga paggamit sa gadgets.
Gipahinumdoman usab ang mga ginikanan nga dili lamang screen time ang bantayan, kundili ang hustong pahulay sa mata, makalingaw nga outdoor activities ug regular nga pagpatan-aw sa eksperto kung adunay mga timailhan sa problema sa panan-aw.
Photo courtesy: The Everymom
