Napasidunggan sa Dakbayan sa Davao, uban sa Department of Education–Davao City Division, ang mga atleta ug coaches nga nirepresentar sa Davao City sa DAVRAA 2026 ug Palarong Pambansa 2026 isip pag-ila sa ilang talagsaong kalampusan sa mga kompetisyon dili palang dugay.
Tungod sa ilang dedikasyon ug maayong pagpangandam, nakab-ot sa Rehiyon sa Davao ang ikatulong pwesto sa kinatibuk-ang medal tally (Third Overall) sa Palarong Pambansa 2026, samtang ang Davao City nailhan usab isip ikalimang labing maayo nga performing division tali sa 220 ka dibisyon sa tibuok nasud.
Sa maong Palarong Pambansa nga gipahigayon sa Agusan del Sur, nakatigom ang Rehiyon sa Davao og 100 ka medalya nga naglangkob sa 34 ka bulawan, 32 ka pilak, ug 34 ka tumbaga. Gikan niini, 49 ka medalya ang nakuha sa mga atletang gikan sa Davao City. Samtang sa DAVRAA 2026, napasidunggan ang Davao City isip Overall Champion.
Alang sa Palarong Pambansa 2026, ang matag gold medalist, coach, ug chaperone nakadawat og ₱15,000; ang matag silver medalist, coach, ug chaperone nakadawat og ₱12,000; samtang ang matag bronze medalist, coach, ug chaperone nakadawat og ₱10,000.
Sa DAVRAA 2026, ang matag gold medalist, coach, ug chaperone nakadawat og ₱10,000; ang matag silver medalist, coach, ug chaperone nakadawat og ₱8,000; ug ang matag bronze medalist, coach, ug chaperone nakadawat og ₱5,000.
