Narekober sa kasundalohan ubos sa 88th Infantry “Maringal” Battalion sa Philippine Army ang duha ka tag-as nga kalibre sa armas ug uban pang mga kagamitan sa gubat nga gituohang gipanag-iya sa mga rebeldeng New People’s Army (NPA) didto sa usa ka giabandonar nga kubo sa Sitio Matangpatang, Barangay Miglamin, Malaybalay City, Bukidnon ning bulan sa Hulyo 2026.
Ubos sa pagpanguna ni Lt. Col. Arnold M. Bautista, Commanding Officer, nasakmit sa militar ang usa ka M4A1 Carbine Rifle, usa ka cal.30 Carbine Rifle, duha ka mga magazine, 138 ka rounds sa 5.5mm nga bala, 48 ka rounds sa cal.30, ug duha ka mga military bag nga gibiyaan sa maong dapit.
Nadiskobrehan ang maong taguanan sa mga armas pinaagi sa gipahigayon nga hugot nga intelligence operations human sa nahitabong serye sa mga engkwentro tali sa NPA batok sa pwersa sa 1st Special Forces Battalion ug sa 8th Infantry Battalion ubos sa 403rd Brigade.
Matud pa ni Brig. Gen. Seigfred C. Tubalado, Commander sa 403rd Brigade, ang kalamposan sa maong operasyon nagpakita lamang sa walay puas nga tinguha sa kasundaluan nga putlon ang kapasidad sa mga rebelde pinaagi sa pagbawi sa ilang mga armas ug uban pang kahinguhaan nga nagdala og kakuyaw ug hulga sa kalinaw sa komunidad
Photo Courtesy: 4th ID Philippine Army
