Nitala sa 8.6 porsyento ang inflation rate o kapaspas sa pagsaka sa presyo sa mga palaliton ug serbisyo sa lalawigan sa Bukidnon niadtong Hunyo 2026, sumala sa taho sa Philippine Statistics Authority (PSA) Bukidnon atol sa online press briefing kagahapong adlawa.
Bisan og adunay gamay nga pag-us-os gikan sa 8.9 porsyento niadtong Mayo, ang Bukidnon gihapon ang nagpabiling adunay pinakataas nga inflation rate sa tibuok rehiyon sa Northern Mindanao, samtang nakatala lamang og 3.1 porsyento ang isla sa Camiguin.
Gipasabot ni Maria Evangelin Non, Chief Statistician sa PSA Bukidnon, nga ang pagsaka sa presyo sa pagkaon ug mga ilimnong dili makahubog—ilabina sa mga nag-unang konsumo sama sa bugas, mais, ug isda—maoy nag-unang rason sa maong inflation. Gawas niini, dako usab ang natampo sa mahal nga bayranan sa transportasyon tungod sa pagmahal sa gasolina ug diesel, dungan sa pagsaka sa bayranan sa kuryente, tubig, ug presyo sa LPG nga gigamit sa mga panimalay.
Sa kinatibuk-an, ang average inflation sa Bukidnon sa unang unom ka bulan ning tuiga miabot sa 6.3 porsyento, mas ubos kon itandi sa 7.0 porsyento nga average sa tibuok Northern Mindanao.
Padayon karon ang gihimong pagmonitor sa PSA sa lihok sa presyo sa mga batakang palaliton aron masubay ang epekto niini sa panginabuhi sa mga katawhan sa probinsya.
Photo Courtesy: PSA
