Naangol ang unom ka mga estudyante sa Central Mindanao University (CMU) human nangalagpot gikan sa usa ka Isuzu Elf truck sa dihang kalit nga nalugti ang lock sa tuo nga bahin sa siding niini subay sa Sayre Highway sa Purok 3, Dologon, Maramag, Bukidnon, Hulyo 15, 2026, sa may alas-8:00 sa gabii.
Base sa report sa kapolisan naglawig ang sakyanan nga gimaneho sa usa ka 27-anyos nga driver gikan sa Valencia City padulong sa CMU Main Gate ug nagkarga og gibana-bana nga 55 ka mga estudyante gikan sa Dairy area sa dihang nahitabo ang maong aksidente nga niresulta sa pagkahulog sa unom ka biktima ngadto sa daplin sa dalan.
Ang mga biktima—nga gilangkuban sa duha ka lalaki ug upat ka babaye nga pulos anaa sa saktong panuigon—daling gipangdala sa rescue team ngadto sa Bukidnon Provincial Hospital (BPH) sa Maramag aron matambalan.
Tungod sa gikinahanglang dugang nga pag-atiman, ang usa ka babaye nga biktima gibalhin sa Pahilan Hospital sa Don Carlos, samtang ang laing usa ka babaye ug usa ka lalaki gibalhin usab sa Simbolan Hospital sa susamang lungsod.
Sa pagkakaron, ang driver ug ang Isuzu Elf nga adunay plate number KAO 1212 anaa na sa kustodiya sa Maramag Municipal Police Station alang sa saktong disposisyon ug dugang imbestigasyon.
Photo Courtesy: Maramag Municipal Police Station
