Nagtingkagol karon sa selda sa kapulisan ang tulo ka indibidwal human sila masakpan sa akto nga nagpahigayon og gituohang drug pot session sulod sa usa ka balay sa Purok 4, Castillo Village, Brgy. Mangagoy, Bislig City, niadtong nakalabay nga adlaw.
Gilunsad ang operasyon sa mga operatiba sa Intelligence Section sa Bislig Component City Police Station ubos sa direktang kamandoan ni PLTCOL Jassen N. Tuario, Acting Chief of Police, human makadawat og impormasyon gikan sa usa ka nagpakabanang lungsuranon pinaagi sa tawag sa telepono.
Sumala sa kapulisan, naabtan sa mga operatiba ang tulo ka suspetsado pinaagi sa abli nga bintana sa balay samtang anaa sa tunga-tunga sa ilang gituohang pot session. Tungod niini, misulod dayon ang mga operatiba ug gidakop ang mga suspetsado.
Narekober gikan sa ilang posisyon ug kontrol ang gibanabanang usa ka gramo sa gituohang shabu nga adunay Standard Drug Price nga ₱6,800, lakip ang nagkadaiyang drug paraphernalia sama sa mga plastic sachet nga adunay residue sa gituohang shabu, improvised plastic scoops, plastic tooter, plastic tube, glass bubble pipe, improvised needles, aluminum foils, ug uban pang gamit nga gituohang gigamit sa paggamit sa ilegal nga droga.
Nakumpiskar usab ang mga operatiba og usa ka buhing bala sa 9mm nga armas, nagkalain-laing mga kahon ug pouch, mga bamboo clips, disposable lighter, ug duha ka gunting isip kabahin sa mga non-drug evidence.
Sa pagkakaron, anaa na sa kustodiya sa Bislig Component City Police Station ang tulo ka suspetsado. Giandam na usab sa kapulisan ang kasong paglapas sa Republic Act 9165 o Comprehensive Dangerous Drugs Act of 2002 batok kanila.
Photo courtesy: Bislig PNP
