Opisyal nang iapil sa Cebu Schools Athletic Foundation, Inc. (CESAFI) ang pickleball isip bag-ong duwa sa umaabot nga season, kini sumala sa pamahayag ni CESAFI Commissioner Felix “Boy” Tiukinhoy.
Giklaro ni Tiukinhoy nga gitun-an ug humanon pa sa mga opisyales ang mga detalye sama sa venue, format sa kompetisyon, ug mga kategoriya nga pagaduwaon.
Gilauman nga alang lamang kini sa collegiate division, apan wala pa matino kung alang ba sa men’s, women’s o mixed category.
Gawas sa pickleball, ipaila usab sa CESAFI ang petanque isip demonstration sport aron mapalapdan pa ang kahigayonan sa mga student-athlete sa nagkadaiyang natad.
Himuon na usab nga regular nga kategorya ang women’s division sa CESAFI Esports League alang sa Mobile Legends: Bang Bang ug Valorant.
Samtang sa basketball, musalmot usab karong season ang San Roque College de Cebu Greyhounds sa high school division ug lakip ang University of Cebu Lapu-Lapu and Mandaue (UCLM) Webmasters sa men’s collegiate division.
Photo courtesy: Healthline
