Nagkahiusa ang mga boluntaryong blood donor gikan sa nagkalain-laing sektor sa lungsod sa Ipil atol sa malampusong pagpahigayon sa Mass Blood Donation Program isip kabahin sa pagsaulog sa National Blood Donors Month.
Ang kalihokan gipangulohan sa Municipal Health Office sa LGU Ipil uban sa Philippine Red Cross, Dr. George T. Hofer Medical Center, Integrated Provincial Health Office sa Zamboanga Sibugay ug Department of Health.
Nagtapok ang mga empleyado sa gobyerno, miyembro sa mga organisasyon, ug mga ordinaryong lumulupyo aron motubag sa panawagan sa pagdonate og dugo alang sa mga pasyenteng nanginahanglan niini.
Lakip sa mga boluntaryong donor si Ipil Mayor Ramses Troy D. Olegario, nga mipakita sa iyang suporta pinaagi sa personal nga pag-apil sa maong kalihokan.
Sumala sa mga organizer, ang matag bag sa dugo nga nakolekta mahimong makatabang sa mga pasyenteng nanginahanglan og emergency blood transfusion, mga inahan nga manganak, mga biktima sa aksidente ug uban pang adunay seryosong kahimtang sa panglawas.
Gipasiugda usab nga ang dugo dili mahimong mapuli sa bisan unsang tambal o makina, busa dako ang papel sa mga boluntaryong donor sa pagluwas sa kinabuhi.
Nagpasalamat ang LGU Ipil sa tanang donors, partner agencies, health workers ug volunteers nga nahimong kabahin sa kalihokan ug mipakita sa tinuod nga espiritu sa pagtabang ug pag-amuma sa komunidad.
Photo Courtesy: linkedln
