Mikabat sa 1,334 ka mag-uuma sa lungsod sa Tagbina ang nakadawat og ayuda ilalom sa Presidential Assistance to Farmers and Fisherfolk (PAFF) atol sa distribution nga gipahigayon niadtong Hulyo 13 ug 14 sa Tagbina Municipal Gymnasium.
Ang maong programa gipangulohan sa Department of Agriculture (DA) sa pakigtambayayong sa Lokal nga Pangagamhanan sa Tagbina ug sa Municipal Agriculture Office, aron suportahan ang mga mag-uuma sa pagpadayon sa ilang pagpanguma, pagpalambo sa ilang ani, ug pagtabang sa ilang panginabuhi ug pamilya.
Nagpasalamat si Tagbina Mayor Glaiza Jane Polizon-Lanete sa Department of Agriculture alang sa padayon nga suporta sa mga mag-uuma ug mangingisda sa lungsod. Gipasiugda usab niya ang lig-on nga paningkamot sa lokal nga pangagamhanan sa pagpauswag sa kahimtang sa mga nag-agad sa sektor sa agrikultura ug pangisda.
Kabahin ang maong distribution sa padayon nga inisyatibo sa nasudnong gobyerno sa paghatag og tukmang panahon nga ayuda sa mga mag-uuma, pagpalig-on sa produksyon sa agrikultura, ug pagsiguro sa lig-on nga suplay sa pagkaon alang sa mga komunidad.
Photo courtesy: LGU Tagbina
