Nabawi sa mga tropa sa 30th Infantry Battalion (30IB) ug 36th Infantry Battalion (36IB) ang tulo ka high-powered firearms nga gilubong sa kabukiran sa Sitio Tubakon, Barangay Bitaugan, San Miguel, Surigao del Sur niadtong Hulyo 13, 2026.
Sumala sa kasundalohan, ang maong operasyon nahimo human makadawat sila og kasaligan nga impormasyon gikan sa mga kanhi miyembro sa Communist Terrorist Group (CTG) nga boluntaryong misurender ug mibalik sa sabakan sa gobyerno. Pinaagi sa maong impormasyon, malampusong natultolan sa mga sundalo ang nahimutangan sa gilubong nga mga armas ug kini ilang nabawi.
Gipahayag sa Philippine Army nga ang maong kalampusan kabahin sa ilang padayon nga kampanya aron mapalig-on ang kalinaw ug seguridad sa rehiyon, human ideklara ang Caraga Region ubos sa Stable Internal Peace and Security (SIPS) niadtong Hunyo 18, 2026.
Bisan pa nga nabungkag na ang organisadong armadong pwersa sa CTG sa rehiyon, nagpadayon gihapon ang mga operasyon sa militar aron mabawi ang nahibiling mga armas sa mga rebelde, mapugngan ang posibleng pagbangon pag-usab sa insurgensya, ug masiguro ang kaluwasan sa mga komunidad.
Matud ni Lt. Col. Rey Vergel A. Annogui, Commanding Officer sa 30IB, ang malampusong pagbawi sa mga armas nagpakita sa dakong papel sa mga kanhing rebelde ug sa kooperasyon sa komunidad sa pagmintinar sa kalinaw ug kaluwasan sa rehiyon.
Nagpadayon usab ang Philippine Army sa pag-awhag sa publiko nga maghatag og kasaligan nga impormasyon ngadto sa mga otoridad aron mapadayon ang mga kalampusan batok sa insurgensya ug mapanalipdan ang kalinaw, kaluwasan, ug kalamboan sa tibuok Caraga Region.
Photo courtesy: 30th Infantry “Fight On” Battalion, Philippine Army
