Gipahibalo ni Presidente Ferdinand “Bongbong” Marcos Jr. nga gipalapad sa gobyerno ang United Package for Livelihoods, Industry, Food, and Transport (UPLIFT) Assistance aron matabangan ang mga kabus nga Pilipino nga naapektuhan sa pagsaka sa presyo sa gasolina.
Sumala sa Presidente, mokabat sa 7.5 milyong panimalay o 37.5 milyong Pilipino sa tibuok nasud ang gilaumang makabenepisyo sa cash assistance.
Lakip sa makadawat ang 3.5 milyong household beneficiaries sa Pantawid Pamilyang Pilipino Program o 4Ps ug Walang Gutom Program, nga hatagan og one-time additional assistance nga hangtod ₱2,000.
Hatagan usab og tabang ang 2.5 milyong poor ug near-poor households nga nailhan pinaagi sa 2024 Community-Based Monitoring System (CBMS).
Samtang, 1.5 milyong low-income workers ug ilang mga pamilya nga ma-verify sa Social Security System o SSS ang makadawat og ₱2,000 kada bulan gikan Hulyo hangtod Disyembre 2026.
Ang Department of Social Welfare and Development (DSWD) maoy manguna sa pagpatuman sa programa, uban sa koordinasyon sa ubang ahensya sa gobyerno.
Matud ni Marcos, tumong sa UPLIFT Assistance nga matabangan ang mga pamilyang Pilipino sa ilang adlaw-adlaw nga panginahanglan, ilabi na karong naapektuhan ang presyo sa gasolina ug mga palaliton tungod sa tensyon sa Middle East.
Photo Courtesy: Philippine News Agency
