Gipaningkamotan sa lokal nga gobyerno sa General Santos City nga mapaspasan ang rehabilitasyon ug pagpadayon sa konstruksyon sa bag-ong gusali sa Dr. Jorge P. Royeca City Hospital nga nadaot tungod sa kusog nga linog. Tumong niini nga dali nga mahipos ang kadaot sa pasilidad aron mapadayon ang proyekto ug mas mapalambo ang paghatag og serbisyo sa panglawas alang sa mga residente sa dakbayan.
Kabahin sa maong paningkamot, gipangunahan ni Mayor Lorelie Geronimo Pacquiao ang usa ka koordinasyon nga miting uban sa mga opisyal ug kawani sa Department of Public Works and Highways o DPWH Region 12 ug uban pang mga hingtungdan. Gihisgutan sa maong tigom ang mga sunod nga lakang aron mapadali ang rehabilitasyon sa estruktura, lakip ang pagpadayon sa mga kinahanglanong teknikal nga proseso ug koordinasyon tali sa mga ahensya.
Sumala sa lokal nga kagamhanan, padayon ang paningkamot aron masiguro nga ang bag-ong hospital building mahimong mahuman sa labing luwas ug episyenteng paagi, isip kabahin sa pagpalig-on sa mga pasilidad sa panglawas sa General Santos City ug aron masiguro ang padayon nga pag-alagad sa katawhan.
Photo Courtesy:LGU General Santos
