Makaeskwela na og kolehiyo ang 39 ka Persons Deprived of Liberty (PDLs) sa dakbayan sa Mandaue pinaagi sa “College and Skills Behind Bars” program nga gilusad sa lokal nga kagamhanan, Mandaue City College (MCC), ug Bureau of Jail Management and Penology (BJMP).
Matud ni Mandaue City College Administrator Dr. Joey Rivamonte, magsugod ang klase sa Hulyo 30 sulod mismo sa BJMP facility, diin ang mga magtutudlo sa MCC maoy mohatag sa face-to-face classes. Ang unang kurso nga gitanyag mao ang Bachelor of Science in Business Administration major in Marketing Management.
Sumala usab ni BJMP Mandaue Jail Warden Jail Supt. Jessie James Gingoyon, lakip usab sa programa ang skills training pinaagi sa pakigtambayayong sa TESDA ug CHED aron maandam ang mga PDL alang sa trabaho kung sila makagawas na sa prisohan.
Ang tanan nga gasto sa edukasyon pagasagubangon sa Mandaue City Government ug MCC isip kabahin sa reintegration program sa dakbayan.
Photo courtesy: BJMP Mandaue City Jail-Male Dormitory
