Gipasiugdahan sa Department of the Interior and Local Government (DILG) nga ang ubang teammates nila Rene Baterbonia ug Divine Adili sa Ateneo de Manila University, nga mitambong sa team-building activity sa Aurora, giila usab nga mga biktima ug dili apil sa mga girekomendang kasohan.
Matod ni Interior Secretary Jonvic Remulla, wala’y nakitang basehan aron himuong respondents ang ubang student-athletes tungod kay sila usab nabiktima sa giingong mapintas nga training.
Sa miaging semana, girekomenda sa Criminal Investigation and Detection Group (CIDG) ang pagpahigayon og preliminary investigation batok kang kanhi Ateneo coach Tab Baldwin ug 10 pa ka indibidwal tungod sa posibleng paglapas sa Anti-Hazing Law. Lakip sa mga girekomendang respondents ang pipila ka miyembro sa coaching staff, duha ka student managers, ug duha ka utility workers.
Apan, giingon ni Remulla nga posible pang tangtangon sa Department of Justice (DOJ) ang mga student managers ug utility workers sa listahan sa mga respondents ug himuon na lamang silang mga testigo, kon mapamatud-an nga wala sila kahibalo sa tinuod nga katuyoan sa maong kalihokan.
Gipasiugda usab ni Remulla nga ang labing importante mao ang pagpapanubag sa mga nagplano ug responsable sa giingong pagpasakit sa mga student-athletes.
Photo Courtesy: Wikipedia
