Nadakpan ang duha ka indibidwal atol sa joint drug buy-bust operation nga gipahigayon sa kapulisan sa Purok 11, Super Highway, Barangay Aplaya, Digos City, alas 2:28 sa kaadlawon niadtong nakalabay nga adlaw.
Target sa operasyon ang usa ka 25-anyos nga giila nga si alyas “RJ,” apan nadakpan usab ang iyang kauban nga 31-anyos nga giila sa alyas “DEL,” parehong residente sa PNP Village, Barangay Zone II, Digos City.
Matud sa Digos City Police Station, nakuhaan si “RJ” og buy-bust item, laing pakete sa gituohang shabu, cellphone, ug marked money, samtang usa usab ka pakete sa gituohang shabu ang narekober kang “DEL.”
Sa kinatibuk-an, 8.56 gramos sa gituohang shabu nga nagkantidad og ₱58,208.00 ang nakumpiska. Ang duha karon anaa na sa kustodiya sa Digos City Police Station ug giandam na ang kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
