Napildi pinaagi sa unanimous decision ang kanhi world champion nga si Jerwin Ancajas batok sa wala pa mapildi nga Amerikanong boksidor nga si Omar Trinidad sa co-main event sa Zuffa Boxing 08 sa Las Vegas.
Parehong 97-93 ang iskor sa tulo ka judges pabor kang Trinidad, nga nagpabiling wala pay kapildihan uban sa rekord nga 21-0-2.
Tabok ang unang mga rounds, apan sugod sa ikaunom nga round, anam-anam nga nakontrol ni Trinidad ang duwa pinaagi sa mas daghang epektibong mga hampak. Sa ika-10 ug katapusang round, misulay si Ancajas og agresibong pag-atake apan natandog siya sa kusog nga right hand sa iyang kontra.
Bisan pa niini, nakabarog si Ancajas hangtod sa katapusang bell. Sa opisyal nga estadistika, nalabwan siya ni Trinidad sa total punches, 172-113, lakip ang 118-62 nga bentaha sa power punches.
Ang kapildihan maoy nagtapos sa upat ka sunod nga kadaugan ni Ancajas, nga karon adunay rekord nga 38-5-2.
Photo Courtesy: x.com
