Mopagawas ang kapitolyo sa provinysa sa sugbo og inisyal nga ₱50 milyon pinansyal nga tabang alang sa Mandaue City-run Hospital aron mapalambo ang serbisyo sa panglawas sa dakbayan.
Gipahibalo kini ni mismo ni Cebu Governor Pamela Baricuatro atol sa flag-raising ceremony sa Mandaue City Hall karung adlawa Hunyo 29, 2026 diin iyang giingon nga ang maong pondo igahin alang sa medical equipment sa hospital ug dugangan pa sa umaabot nga budget.
Gipasalig usab sa gobernadora ang padayon nga suporta sa Kapitolyo sa mga prayoridad nga programa sa dakbayan, ilabina sa sektor sa panglawas, samtang gidayeg niya ang liderato ni Mayor Thadeo “Jonkie” Ouano sa pagpatuman sa maayong pagdumala, transparency ug accountability.
Nagpasalamat si Mayor Ouano sa tabang sa Kapitolyo, nga matud niya dako og ikatampo sa pagpaandar sa bag-ong city hospital.
Sumala sa mayor, ang ₱400 milyon nga nakuha sa siyudad kaniadto gigamit alang sa pagtukod sa hospital building, samtang ang ₱50 milyong tabang gikan sa Provincial Government igahin alang sa pagpalit sa medical equipment aron hingpit nga mapaandar ang pasilidad ug mas mapalapad ang serbisyo sa mga Mandauehanon.
Photo courtesy: Cebu Province
