Gipalig-on karon sa Misamis Oriental Provincial Veterinary Office (PVET) ang ilang anti-rabies vaccination program isip tubag sa nagkataas nga ihap sa mga kaso sa mga napaakan sa lalawigan.
Matod ni PVET Head Dr. Benjie Resma, importante nga mabakunahan batok sa rabies ang mga iro ug iring aron mapanalipdan ang mga mananap ug malikayan ang posibleng pagkatakod sa tawo kon adunay insidente sa pagpamaak.
Gipasabot usab ni Resma nga ang mga tag-iya sa mga binuhi adunay dakong responsibilidad sa pag-atiman ug pagpasiguro nga mabakunahan ang ilang mga iro ug iring batok sa rabies.
Dugang pa niya, ang mga pet owners ang usa sa adunay mas taas nga risgo sa pagkatakod sa rabies kon mapaakan sa ilang wala mabakunahang binuhi.
Busa, giawhag sa PVET ang tanang pet owners nga makigtambayayong sa anti-rabies vaccination program aron mapugngan ang pagkatag sa rabies ug mapanalipdan ang panglawas sa komunidad.
Photo courtesy: Provincial Veterinary Office Misamis Oriental
