Padayon ang kampanya sa Bureau of Fire Protection aron mapalig-on ang kahibalo sa komunidad sa hustong pagresponde panahon sa sunog.
Matod ni FO3 Kevin Karl Vallejos, nga padayon ang ilang community outreach ug information drive sa mga dagkong barangay aron matudloan ang mga residente sa angay buhaton kon adunay insidente sa sunog.
Gibutyag usab ni Vallejos nga nakita ang positibong resulta sa kampanya sa pinakabag-ong sunog nga nahitabo sa Macanhan, Barangay Carmen, diin ang mga residente nagtinabangay ug dali nga nakatawag sa Bureau of Fire Protection, nga nakatabang sa mas paspas nga pagresponde sa mga bombero.
Mahinumdoman nga na sunog ang panimalay sa pamilyang Fabia sa Zone 9, Macanhan, Carmen ning syudad nga nag resulta sa 120mil pesos nga damyos ug giimbestigahan pa ang hinungdan sa sunog.
Lambigit nga balita, nagpahimangno ang Barangay Carmen sa mga residente nga magmatngon ug magbantay sa ilang mga panimalay aron malikayan ang mga insidente sa sunog ug uban pang emerhensiya.
Matod ni Joshua Aaron Tumanilak, Brgy Sec sa Carmen, nga padayon ang barangay sa pagpahigayon og fire safety training alang sa mga residente aron mapalig-on ang ilang kahibalo sa hustong pagtubag panahon sa emerhensiya.
Gibutyag usab niya nga ang pagbansay gihimo matag zone sa barangay aron mas daghang residente ang makat-on sa husto nga pamaagi sa pagresponde sa sunog ug uban pang peligro, isip kabahin sa pagpalig-on sa kaandam ug kaluwasan sa komunidad.
Photo courtesy: Bfp-R10 Carmen Fire Station
