Giawhag sa Philippine National Police (PNP) ang mga tunghaan nga makig-koordinar una sa lokal nga kapulisan sa dili pa magpahigayon og mga dagkong aktibidad gawas sa eskwelahan (off-campus activities).
Sumala ni PNP chief Gen. Jose Melencio Nartatez Jr., importante kini nga lakang aron masiguro ang kaluwasan sa mga estudyante pinaagi sa saktong security assessment, emergency response planning, traffic management, ug pagpangandam sa rescue ug medical services.
Tungod niini, nagpagawas og direktiba ang PNP sa tanang lokal ug rehiyonal nga buhatan sa pulisya nga pakusgon ang pakigtinabangay sa Department of Education (DepEd) ug Commission on Higher Education (CHED). Kini nga lakang gihimo human sa makapasubo nga insidente sa pagkalumos sa mga atleta sa Ateneo Blue Eagles nga sila si Rene Baterbonia ug Divine Adili sa usa ka team-building activity didto sa Dipaculao, Aurora, ingon man ang mga sunod-sunod nga kaso sa pamusil ug panunggab nga naglambigit sa mga menor de edad.
Gawas sa koordinasyon alang sa mga aktibidad, gipasalig usab sa PNP nga ilahang dugangan ug palig-onon ang police visibility o ang presensya sa mga pulis sa palibot sa mga tunghaan. Tumong niini nga makamugna og mas luwas nga palibot alang sa mga magtutungha, dungan sa pagpahinumdom ni Nartatez nga ang pagpugong sa dautan nagsugod sa lig-on nga panagtambayayong ug sayong pagplano.
Photo courtesy:Philippines News Agency
