Giawhag ni Senate President Win Gatchalian ang Energy Regulatory Commission (ERC) nga paspasan ang pagproseso sa pagbalhin sa mga konsumer ngadto sa ilang gipiling supplier sa kuryente gikan sa kasamtangang distribution utility (DU) sama sa Meralco. Subay kini sa kamandoan sa ERC nga mahimo nang mopili ang mga konsumer sa ilang gustong supplier tungod sa gipatuman nga 100-kilowatt (kW) contestability threshold o ang minimum nga konsumo sa kuryente aron tagaan og katungod ang usa ka konsumer nga mopili sa iyang kaugalingong power supplier. Kaniadto, ang threshold anaa pa sa 500 kW.
Gipasabot ni Gatchalian nga kon ang konsumo sa kuryente sa mga panimalay, gagmay nga negosyo, o mga tunghaan moabot o molapas na sa threshold, dili na sila mag-agad lang sa distribution utility tungod kay pwede na silang mokuha gikan sa gitawag nga Retail Electricity Supplier (RES). Pinaagi niini, adunay kahigayonan ang mga konsumer nga makakuha og mas barato o mas limpyo nga kuryente gikan sa renewable energy.
Bisan pa man niini, gipahayag sa senador nga kinahanglang himuong mas paspas ug sayon ang pagbalhin tungod kay sa pagkakaron, nagkinahanglan pa kini og pipila ka semana kon itandi sa ubang nasod nga pipila lang ka adlaw ang gitas-on. Matod pa niya, dako kaayo og tabang kon wagtangon ang kahasol sa pagbalhin aron mas ma-engganyo ang publiko sa pagpili og mas competitive nga presyo ug mas limpyo nga enerhiya nga makahatag og kaayohan sa mas daghang pamilya.
Photo courtesy: Philippines News Agency
