Gikonsiderar sa gobyerno sa South Korea ang pagpaubos sa edad sa kriminal nga responsibilidad gikan sa 14 ngadto sa 13-anyos alang sa mga menor de edad nga nakahimo og seryosong krimen. Sumala sa mga taho, nagkasabot ang Ministry of Justice ug Ministry of Gender Equality and Family sa maong rekomendasyon, nga isumite sa Cabinet alang sa paghisgot.
Ang lakang mitumaw human misaka ang gidaghanon sa mga krimen nga gihimo sa mga menor de edad. Gikan sa 11,677 ka kaso niadtong 2021, misaka kini ngadto sa 21,095 ka kaso niadtong 2025, lakip ang daghang kaso sa sexual crimes ug kapintasan.
Bisan pa, misupak ang mga human rights groups ug pipila ka mga eksperto sa maong plano. Matod nila, mas angay nga tutokan ang pagpugong sa krimen kaysa pagpatuman og mas bug-at nga silot sa mga batan-ong nakalapas sa balaod.
Kung aprobahan sa administrasyon ni Presidente Lee Jae Myung, pagahisgotan pa ang detalye sa balaod, lakip ang klarong depinisyon sa “seryosong krimen.”
Photo courtesy: Philippine News Agency
