Gikumpirma sa Land Transportation Franchising and Regulatory Board (LTFRB) nga gisuspenso niini ang operasyon sa usa ka electric vehicle (EV) taxi human nalambigit ang drayber niini sa usa ka “robbery prank” uban sa duha ka vloggers.
Sa viral nga video, makita ang drayber nga nagpahibalo sa usa ka tulis. Gisundan kini sa pag-apil sa duha ka vloggers nga nagpakaaron-ingnong mga tulisan.
Gipadayag ni LTFRB Chairman Vigor Mendoza II nga ang maong klase sa prank naghatag og sayop nga mensahe sa publiko nga dili luwas ang pagsakay og taxi sa Pilipinas.
Tungod niini, gipailalom sa 30 ka adlaw nga suspensyon ang maong drayber samtang nagpadayon ang imbestigasyon sa ahensya. Gawas niini, mopagawas usab ang LTFRB og “show-cause order” batok sa Green and Smart Mobility Philippines, Inc., ang tag-iya sa EV taxi nga nalambigit sa maong insidente.
Nagpahinumdom ang mga awtoridad sa publiko ug sa mga content creators nga magbinantayon sa paghimo og video aron dili makapahabwag og panic o kahadlok sa katilingban.
Photo Courtesy: Wikipedia/ Wired
