Posibleng ablihan sa Senado isip Impeachment Court ang usa ka selyadong kahon nga naglangkob sa income tax records ni Vice President Sara Duterte atol sa impeachment trial nga magsugod sa Hulyo 6.
Matod ni Senate President Sherwin Gatchalian, mahimo kining ablihan bisan wala pa kini ma-markahan isip opisyal nga ebidensya sa pre-trial conference.
Ang kahon gikan sa Bureau of Internal Revenue (BIR) ug naglangkob sa tax records ni VP Sara, sa iyang bana nga si Manases Carpio, ug sa ilang mga kompanya.
Nalangan ang pag-abli niini human hatagan una og higayon ang depensa sa paghatag sa ilang komento sa hangyo sa prosekusyon.
Sumala sa Senado, kinahanglan una ang pagtugot sa Impeachment Court aron maablihan ang mga dokumento.
Gitinguha sa prosekusyon nga gamiton ang maong tax records isip ebidensya sa alegasyon nga adunay yaman nga dili umano motugma sa kita ni Vice President Duterte ug sa giingong kakulangan sa hustong pagdeklara sa iyang SALN.
