Gikalipay sa mga kabataan ang usa na usab ka malampusong gipahigayon nga ang ilang ikaduhang “IGSOON Bayanihan Feeding Program” ug pagpanghatag sa mga school supplies sa 102nd Infantry (IGSOON) Brigade sa Philippine Army niadtong nakalabay nga adlaw.
Kini nga kalihokan gipahigayon sa Madrasah Zaid Bin Harith Al-Islamiya nga nahimutang sa Barangay Kitabog, Titay, Zamboanga Sibugay, diin mokabat sa 200 ka mga estudyante sa Madrasah ang nahimong benepisyaryo.
Ang maong programa gipahigayon pinaagi sa kolaborasyon sa Provincial Government of Zamboanga Sibugay (PLGU), Municipal Local Government Unit (MLGU) sa Titay, Barangay Local Government Unit (BLGU) sa Kitabog, ug ang Gawad Kalinga.
Sumala sa militar, kini nga inisyatibo nagpakita sa tinuod nga espiritu sa Bayanihan pinaagi sa paghatag og masustansyang pagkaon ug mga gamit sa eskwelahan sa mga kabataan.
Gawas sa pagpakaon, tumong usab niini nga palig-onon ang relasyon tali sa kasundalohan ug sa komunidad, ingon man ang paghatag og suporta sa edukasyon aron maseguro ang mas hayag ug malinawon nga kaugmaon alang sa mga kabataan sa maong dapit.
Ang operasyon giisip nga dakong lakang sa pagtukod og pagsalig ug panaghiusa sa mga lumulupyo sa Zamboanga Sibugay.
