Nasakmit sa mga operatiba ang duha ka indibidwal atol sa maritime law enforcement operation sa baybayon sa Claver, Surigao del Norte, human masakpan nga nagdala og gibanabana nga 2,200 ka litro sa diesel nga walay legal nga permit ug mga dokumento.
Ang operasyon gipahigayon sa Philippine National Police Maritime Group pinaagi sa Hayanggabon Maritime Law Enforcement Team, uban sa Regional Intelligence Division 13 ug Claver Municipal Police Station.
Base sa impormasyon nga nadawat sa kapulisan, ilang nasikop ang cargo vessel nga M/L “J&P LORETO” ug sa ilang pang inspeksyon, ilang nadiskobrehan ang gidala nga diesel, wala’y igong dokumentasyon sa pagbiyahe.
Tungod niini, gikompiska sa mga otoridad ang sakayan, ang diesel fuel, usa ka heavy-duty hose, ug duha ka motor pump nga adunay kinatibuk-ang kantidad nga mokabat sa kapin ₱1,108,000.00.
Ang duha ka suspek giakusahan og paglapas sa Batas Pambansa Blg. 33 nga nagdili sa iligal nga pagbaligya ug pagbiyahe sa petroleum products, samtang padayon ang imbestigasyon ug pagpasaka sa angayng kaso batok kanila.
Gipadayag usab sa PNP Maritime Group nga magpadayon sila sa ilang kampanya batok sa iligal nga transportasyon sa petroleum products aron mapanalipdan ang kaluwasan sa publiko ug masiguro ang husto nga pagpatuman sa balaod sa kadagatan.
Photo Courtesy: PNP Maritime Group
