Arestado ang napulo ka mga langyaw sa usa ka law enforcement operation nga gikasa sa Bureau of Immigration uban sa General Luna Municipal Police Station sa General Luna, Surigao del Norte.
Base sa report, ang operasyon kabahin sa padayon nga kampanya sa gobyerno batok sa mga foreign nationals nga nakalapas sa Immigration Laws. Ang mga nadakpan gilangkuban sa upat ka Israeli, duha ka Chinese, usa ka Lithuanian, usa ka Australian, usa ka Moroccan, ug usa ka Nigerian.
Giatubang sa mga langyaw ang nagkalain-laing paglapas sama sa undesirability, overstaying, blacklisted o walay permit, walay Overseas Employment Certificate o OEC, ug invalid working visa o work permit.
Matod sa kapulisan, adunay pipila sa mga nadakpan nga una nang giatubang og mga kasong kriminal sa General Luna Municipal Police Station. Ang maong mga report gipasa sa Bureau of Immigration isip basehan sa pagsugod sa deportation proceedings batok kanila.
Sa pagkakaron, ang napulo ka mga langyaw anaa sa kustodiya sa General Luna Municipal Police Station samtang gihulat ang ilang pagbalhin ngadto sa detention facility sa Bureau of Immigration.
