Giaprubahan sa International Criminal Court (ICC) Trial Chamber III ang hangyo sa prosekusyon nga ipadayon ang pag-freeze sa mga kwartang nakumpiska gikan kang kanhi Presidente Rodrigo Duterte sa dihang gidakop kini niadtong Marso 2025.
Base sa mga dokumento nga gipagawas sa ICC niadtong Hunyo 27, 2026, gitugotan sa korte ang maong mosyon aron mapugngan ang paglihok sa bisan unsang kantidad nga nakuha gikan kaniya, bisan pa man kung wala gibutyag kung unsa kini kadako.
Gikwestyon ug gisupak sa abogado ni Duterte nga si Atty. Peter Haynes ang maong desisyon tungod kay anaa na man sa kustodiya sa ICC Registry ang maong kwarta ug wala na kini epekto sa nagpadayong hearing. Gawas sa kwarta, gihangyo usab sa prosekusyon nga mahatagan sila og access sa uban pang personal nga gamit sa kanhi presidente nga nakuha sa panahon sa pag-aresto kaniya.
Bisan tuod og wala mosupak ang depensa sa pagsusi sa pipila ka kabtangan, hugot nilang gihangyo nga dili iapil ang mga yawe ug uban pang pribadong butang tungod kay wala kini koneksyon sa krimen nga giimbistigahan. Nanawagan usab ang kampo ni Duterte nga siguradohon sa prosekusyon nga maprotektahan ang mga personal nga impormasyon sa iyang pamilya nga walay kalambigitan sa kaso.
Photo Courtesy: Philippine News Agency
