Nagpatuman og mga bag-ong lakang ang Bangko Sentral ng Pilipinas (BSP) pinaagi sa pag-usab sa ilang e-payments framework aron mahimong mas barato ug mas transparent ang mga digital nga transaksyon sa nasod. Ubos sa Circular No. 1238, gidid-an na ang mga bangko, e-wallets, ug uban pang payment service providers sa pagpataw og taas kaayong bayronon sa person-to-person nga mga e-payment tali sa managlahing institusyon, diin kinahanglan nga haom ug dili kini layo sa bayad nga gisingil sulod sa susamang kompanya o bangko.
Matod ni BSP Governor Eli M. Remolona Jr., dako og ikatabang kini nga kausaban aron mas madasig pa ang mga Pilipino ug mga negosyante sa paggamit sa digital payments. Gihimo sa BSP ang maong lakang isip tubag sa gipagawas nga Consumer Expectations Survey niadtong ikaupat nga kwarter sa tuig 2025, diin migawas nga usa sa matag tulo ka konsumidor ang nag-isip sa nagpabiling taas nga bayronon o transaction fees isip nag-unang babag sa ilang pagbalhin sa digital nga sistema.
Gawas sa pagpaubos sa singil, lakip sa maong bag-ong kamanduan ang pagpalapad sa mga dapit diin mamahimong magamit ang digital payments. Gitugotan na usab ang mga gagmayng negosyo sama sa mga sari-sari store nga makabukas og kaugalingong account gamit lamang ang ilang National ID o uban pang opisyal nga dokumento aron mas sayon alang kanila ang makadawat og bayad pinaagi sa digital ug makasulod sa nagkadaiyang serbisyong pinansyal.
Photo Courtesy: fintechnews.ph/ PNA
