Tulo ka lalaki ang nadakpan sa usa ka operasyon batok sa iligal nga pagmina sa Barangay Bahi, Barobo, Surigao del Sur niadtong Hunyo 27, 2026.
Ang operasyon gipahigayon sa mga kapulisan sa 1301st Maneuver Company, Regional Mobile Force Battalion 13, uban sa Barobo Municipal Police Station, Department of Environment and Natural Resources (DENR), ug Mines and Geosciences Bureau (MGB) Caraga.
Ang mga nadakpan nag-edad og 33, 34, ug 45 anyos ug pulos residente sa Tagbina, Surigao del Sur. Nasakpan sila samtang nagmina og mineral bisan wala silay permit o lisensya gikan sa DENR, nga gikinahanglan ubos sa Philippine Mining Act of 1995 (Republic Act No. 7942).
Atol sa operasyon, nakumpiska sa mga otoridad ang usa ka backhoe nga gibanabanang nagkantidad og ₱5 milyon, tulo ka sako sa yuta nga gituohang adunay bulawan nga ipasusi sa laboratoryo, usa ka diesel-powered water pump, ug pito ka gasoline-powered water pump. Ang kinatibuk-ang kantidad sa mga nakumpiskang ekipo gibanabanaang moabot sa ₱5.092 milyon.
Ang tulo ka suspek anaa karon sa kustodiya sa Barobo Municipal Police Station samtang giandam ang mga kasong ipasaka batok kanila. Ang mga nakumpiskang ekipo gitugyan usab sa DENR-CENRO Lianga alang sa dokumentasyon ug hustong pagdumala.
Photo courtesy: Philippine National Police
