Daw sardinas nga gisud-og lata ang sitwasyon sa napulog usa ka mananagat sa ilang pagka balhog sa bilanggoan human sila nadakpan sa kapulisan tungod sa ilegal nga pagpangisda atol sa hiniusang seaborne patrol operation nga gilusad sa mga operatiba sa katubigan sa Barangay Gayad, Capoocan, Leyte niadtong nakalabay nga adlaw, Hunyo 27, 2026.
Gilusad ang operasyon sa mga personahe sa Capoocan Municipal Police Station (MPS), sa pakigtambayayong sa Capoocan Municipal Environment and Natural Resources Office (MENRO) FLET Team isip kabahin sa gipalig-on nga implementasyon sa Sustainable Coastal and Law Enforcement Operations (SACLEO).
Atol sa patrol, nasakpan sa mga operatiba ang mga suspetsado nga naggamit og superlight sa pagpangisda, usa ka pamaagi nga gidili ubos sa Section 18.6 sa Municipal Fishery Ordinance, sulod sa municipal waters sa Barangay Gayad.
Human sa ilang pagdakop, gipahibalo ang mga suspetsado sa hinungdan sa ilang pag-aresto ug sa ilang katungod ubos sa konstitusyon sa pinulongang ilang nasabtan. Gidala dayon sila sa Capoocan Municipal Police Station uban sa mga nakompisang ebidensya alang sa hustong dokumentasyon ug pagsang-at sa angayng mga kaso batok kanila.
Photo Courtesy: Capoocan Municipal Police Station
