Angol ang tulo ka indibidwal human kini silang nanga bunal ug nanga bagnus sa dalan dihang gi-sungag sa usa ka motorsiklo ang tricycle, didto sa Maharlika Highway, Purok 4, Barangay San Pedro, Alegria, Surigao del Norte, sa makalabayang gabie.
Sa inisyal nga imbestigasyon, nasayran nga nasungag sa motorsiklo ang likod nga bahin sa tricycle nga giingong walay tail lights ug headlights sa higayon sa aksidente.
Ang mga naangol gilangkuban sa 26-anyos nga babaye nga dunay samad sa ulo, usa ka dos anyos nga bata, ug ang 26-anyos nga drayber sa motorsiklo nga nakaangkon og mga dili tiaw nga mga pangus ug bun-og sa nagkalain-laing bahin sa lawas.
Gipadayag usab sa drayber sa motorsiklo nga nakainom siya og makahubog nga ilimnon sa wala pa mahitabo ang insidente.
Dali usab nga mitubag ang Emergency Medical Services Team sa Alegria Fire Station aron paghatag og first aid sa mga biktima, ug daling gidala sa Kitcharao District Hospital pinaagi sa ambulansya sa Bureau of Fire Protection alang sa dugang nga pag-atiman.
Samtang padayon pa ang imbestigasyon sa kapulisan kalabot na sa maong aksidente, samtang padayon usab nga nag paalim ang mga nasamdan.
